POEMA PARA ESCOITAR NO BERSHKA (Celia Parra)

Ir de compras é o remedio perfecto

contra a angustia existencial de sábados

ou venres chuviosos

-crecín en anos,

en experiencia,

ou en talla de pantalón?

E que máis da, se a idade é unha lacra

que se apega nas cartucheiras   unha lapa

que vive nas cadeiras

e abanea a ritmo de salsa

Deslízome

polos corredores do Bershka

a ritmo de house, de chunda-chunda do malo

con contrapunto de moedas e tarxetas de crédito

canto máis rápida sexa a música

máis perchas inundarán os probadores

E o ritmo non para e a ansiedade sácame a lingua desde o espello

levo nos petos todos os meus defectos

e o meu corpo, que cría serea,

torna en balea varada entre as perchas

Como é posible tal deformidade

como estiven enganada tanto tempo

como a distorsión o aumento

como… son carne de corsé

E para consolarme sempre me din

que teño un corazón que non cabe no peito

e un peito tan grande

que xamais entraría nunha 34.

Celia Parra naceu en Ourense, no ano 90 e é Licenciada en Comunicación Audiovisual. Merecedora dos premios Ánxel Casal, 3º premio Minerva en dúas edicións, 3º premio Xuventude Crea de poesía, Premio María Mariño, Premio Avelina Valladares, do cal se publicou o seu primeiro poemario: No berce das mareas. Participou en varios recitais colectivos ("A porta verde do sétimo andar", jam session dos "Picaversos", co colectivo Salsipuedes de Pamplona ó que pertenze...). Escribe e fai audiopoemas e videopoemas publicados no seu blog: abroparentese.blogspot.com. Colabora como "opinadora" no portal Letra en Obras. Xa está tamén editado o seu primeiro CD con audiopoemas, a maioría están sacados de "Código Morse", o seu 2º poemario. Trátase de recitado con bases musicais que ela mesma compón e mestura. O CD, de título Re(c)Verso, estará na rede, na plataforma bandcamp para a súa libre descarga.